بنگلہ دیش کے شہر سلہٹ میں کھیلے گئے ویمنز ایشیا کپ کے گروپ میچ میں قومی ٹیم نے مقررہ 20 اوورز میں 6 وکٹوں کے نقصان پر 137 رنز اسکور کیے، ندا ڈار نے 56 رنز کی جارحانہ اننگز کھیلی۔
دیگر کھلاڑیوں میں کپتان بسمہ معروف نے 32، منیبہ علی 17، سدرا امین 12، عالیہ ریاض 7 جبکہ عائشہ نسیم 9 رنز بناسکیں تھی۔ بھارت کی جانب سے دپتی شرما نے 3، پوجا 2 اور رینوکا سنگھ ایک وکٹ حاصل کیں۔
ہدف کے تعاقب میں بھارتی ٹیم 10 وکٹوں کے نقصان پر محض 124 رنز بناسکی تھی، ابتداء میں بھارتی اوپنرز نے جارحانہ کھیل کا مظاہرہ کیا تاہم پاکستانی بالرز نے وقفے وقفے سے وکٹیں لیں جس کے باعث میچ میں کامیابی حاصل ہوئی۔
پاکستانی بولرز کی جانب سے ناشرہ سندھو نے 3، ندا ڈار اور سعدیہ اقبال نے 2، 2 جبکہ ایمن انور اور طوبیٰ حسن نے ایک ایک وکٹ حاصل کی۔
گزشتہ روز تھائی لینڈ نے پاکستان ویمنز ٹیم کو 4 وکٹوں کی اَپ سیٹ شکست سے دوچار کیا تھا۔
پاکستان ویمنز ٹیم کی کپتان بسمعہ معروف نے میچ کے بعد گفتگو کرتے ہوئے کہا کہ ندا ڈار نے بہترین پرفارمنس دی، جیت کا کریڈٹ پوری ٹیم کو جاتا ہے۔
انہوں نے مزید کہا کہ تھائی لینڈ سے ہارنے کے بعد اپنی خامیوں پر قابو پایا۔
بھارتی ٹیم کی کپتان ہرمن پریت کور کا کہنا تھا کہ پاکستان نے اچھی کرکٹ کھیلی، پاکستان کو جیت کا کریڈٹ جاتا ہے۔ ہرمن پریت کور نے مزید کہا کہ ہدف حاصل کیا جاسکتا تھا، ڈاٹ بالز بہت گئیں جس کے باعث میچ میں کامیابی حاصل نہ کرسکے۔
واضح رہے کہ سال 2016 کے بعد پاکستان ویمنز ٹیم بھارت کو شکست دینے میں کامیاب ہوئی ہے۔
