یاسر شاہ کی سری لنکا کے خلاف قومی ٹیسٹ اسکواڈ میں واپسی ہوئی ہے۔ پاکستان کے چیف سلیکٹر قومی کرکٹ ٹیم محمد وسیم نے دورہ سری لنکا کے لیے 18 رکنی قومی ٹیسٹ اسکواڈ کا اعلان کیا ہے۔
چیف سلیکٹر محمد وسیم کے بیان کے مطابق یاسر شاہ نے مکمل فٹنس حاصل کرکے ٹیم میں جگہ بنائی ہے۔ جبکہ ان کی جگہ کی توجیح دینے کے لیے 36 سالہ لیگ اسپنر کی سات سال پہلے دی جانے والی پرفارمینس کو بنیاد بنایا گیا ہے۔ قومی ٹیم کے 2015 میں کیے جانے والے سری لنکا ٹور کے دوران 36 سالہ لیگ اسپنر نے آخری ٹیسٹ سیریز میں 24 وکٹیں حاصل کرکے پاکستان کو 1-2 سے فتح دلانے میں اہم کردار ادا کیا تھا۔ یاسر شاہ نے آخری مرتبہ اگست 2021 میں ویسٹ انڈیز کے خلاف قومی کرکٹ ٹیم کی نمائندگی کی تھی۔
اب یہاں یاسر شاہ کی فٹنس اور پھر ان کا فٹنس ٹیسٹ ایک ایسا معاملہ ہے کہ جو صرف نظر نہیں کیا جاسکتا۔ اس سے قبل ویسٹ انڈیز کے خلاف ہوم سیریز میں شاداب خان اور حسن علی کو بغیر فٹنس ٹیسٹ کلئیر کیے اسکواڈ کا حصہ بنایا گیا اس پر کرکٹ کے حلقوں میں یہ بات گردش کرتی رہی ہے کہ کپتان کے ساتھ دوستی کی بنا پر فٹنس ٹیسٹ کی شرط ان کھلاڑیوں پر لاگو نہیں ہوتی۔ انہیں ٹیم سلیکشن کے دوران خصوصی استثناء دیا جاتا ہے۔ خاص کر حسن علی کو پہلے بھی ان کی پرفارمینس اور فٹنس کے حوالے سے سخت تنقید کا سامنا کرنا پڑا ہے۔
اب اس کے بعد یاسر شاہ کے ساتھ بھی اگر وہی دوستی کے معیار رکھ کر انہیں بھی فٹنس ٹیسٹ سے استثنیٰ دیا گیا تو وہ پیچھے موجود زاہد محمود اور ساجد خان جیسے نوجوان کھلاڑیوں کے ساتھ سخت ناانصافی ہے۔
یاسر شاہ کے علاوہ سلمان علی آغا کی بھی قومی ٹیسٹ اسکواڈ میں واپسی ہوئی ہے۔ انہوں نے فرسٹ کلاس کرکٹ میں چار ہزار سے زائد رنز بنانے کے ساتھ ساتھ اٹھاسی وکٹیں بھی اپنے نام کررکھی ہیں۔
انجری کے باعث آسٹریلیا کے خلاف ٹیسٹ اسکواڈ سے باہر ہونے والے محمد نواز کو دورہ سری لنکا کے لیے دوبارہ قومی ٹیسٹ اسکواڈ میں شامل کرلیا گیا ہے۔ اب اٹھارہ رکنی قومی ٹیسٹ اسکواڈ میں تین اوپنرز، چار مڈل آرڈر بیٹرز، تین آلراؤنڈرز، دو وکٹ کیپرز، دو اسپنرزاور چار فاسٹ باؤلرز شامل ہیں۔
اعلان کردہ قومی ٹیسٹ اسکواڈ میں بابر اعظم (کپتان)، محمد رضوان (نائب کپتان، وکٹ کیپر)، عبداللہ شفیق، اظہر علی، فہیم اشرف، فواد عالم، حارث رؤف، حسن علی، امام الحق، محمد نواز، نسیم شاہ، نعمان علی، سلمان علی آغا، سرفراز احمد (وکٹ کیپر)، سعود شکیل، شاہین شاہ آفریدی، شان مسعود اور یاسر شاہ شامل ہیں۔
پاکستان اور سری لنکا کے مابین آئی سی سی ورلڈ ٹیسٹ چیمپئن شپ میں شامل دونوں میچز گال اور کولمبو میں کھیلے جائیں گے۔ سیریز کا پہلا ٹیسٹ سولہ سے بیس جولائی تک گال جبکہ دوسرا میچ چوبیس سے اٹھائیس جولائی تک کولمبو میں کھیلا جائے گا۔ سیریز میں شامل واحد تین روزہ وارم اپ میچ گیارہ جولائی سے کولمبو میں شروع ہوگا۔
سیریز کے لیے قومی ٹیسٹ اسکواڈ کا تربیتی کیمپ 26 جون سے راولپنڈی میں شروع ہوگا۔ قومی اسکواڈ 6 جولائی کو سری لنکا کے لیے روانہ ہوگا۔
چیف سلیکٹر محمد وسیم نے پی سی بی ڈیجیٹل میڈیا کی جانب سے اپنے جاری کردہ بیان میں کہا کہ سری لنکا کی گرم کنڈیشنز کو سامنے رکھتے ہوئے قومی ٹیسٹ اسکواڈ کا انتخاب کیا گیا ہے۔ یاسر شاہ کی شمولیت سے ہمارا اسپن اٹیک مضبوط ہوا ہے، جنہوں نے پاکستان کے آخری دورہ سری لنکا میں بھی میچ ونر کا کردار ادا کیا تھا۔ انہیں ساجد خان کی جگہ اسکواڈ میں شامل کیا گیا ہے۔
انہوں نے مزید کہاکہ نعمان علی پہلے ہی قومی ٹیسٹ اسکواڈ کا حصہ ہیں۔ اسکواڈ میں شامل ہونے والے دوسرے کھلاڑی سلمان علی آغا کی ڈومیسٹک کرکٹ میں شاندار پرفارمنسز رہی ہیں۔ نوجوان بیٹر گزشتہ تین سیزنز سے مستقل قابل ذکر کارکردگی کا مظاہرہ کررہے ہیں اور وہ ایک مؤثر آف اسپنر بھی ہیں۔
محمد وسیم نے کہا کہ آسٹریلیا کے خلاف ٹیسٹ سیریز کے نتائج آئیڈیل نہیں تھے تاہم بنگلہ دیش کے خلاف کامیابی حاصل کرنے والی ٹیم نے مہمان ٹیم کے خلاف بھی بہتر مقابلہ کیا تھا اور اچھی کرکٹ کھیلی تھی، جس کی وجہ سے انہوں نے اسکواڈ میں زیادہ تبدیلیاں نہیں کیں۔
سری لنکا ٹور کے دوران اسپورٹنگ اسٹاف میں منصور رانا (منیجر)، ثقلین مشتاق (ہیڈ کوچ)، شاہد اسلم (اسسٹنٹ ٹو ہیڈ کوچ)، محمد یوسف (بیٹنگ کوچ)، شان ٹیٹ (باؤلنگ کوچ)، عبدالمجید (فیلڈنگ کوچ)، کلف ڈیکن (فزیو تھراپسٹ)، ڈریکس سائمن (اسٹرینتھ اور کنڈیشنگ کوچ) کوچ، احسن افتخار ناگی (میڈیا اینڈ ڈیجیٹل کنٹینٹ منیجر)، کرنل (ر) محمد مکرم (سیکیورٹی منیجر)، ڈاکٹر محمد خرم سرور (ٹیم ڈاکٹر)، طلحہ اعجاز (اینالسٹ ) اور ملنگ علی (مساجر) شامل ہوں گے۔
