سری لنکا کی جانب سے دیے گئے 508 رنز کے ہدف کے تعاقب میں پاکستانی بیٹنگ لائین ریت کی دیوار ثابت ہوئی۔ قومی کپتان بابر اعظم کے سوا کوئی بھی بلے باز لنکن بولرز کا گھومتی گیندوں کا سامنا نہ کر سکا۔ 261 رنز بنا کر پوری ٹیم ڈریسنگ روم لوٹ گئی ۔
گال کرکٹ اسٹیڈیم میں کھیلے گئےدوسرے ٹیسٹ میچ کے آخری روز پاکستان نے اپنی دوسری اننگز 89 رنز ایک کھلاڑی آؤٹ پر شروع کی- امام الحق 46 اور بابر اعظم 26 رنز کے ساتھ وکٹ پر موجود تھے تاہم 97 کے مجموعے پر امام الحق 49 رنز بنا کر رمیش مینڈس کی گیند پر وکٹ کیپر کو کیچ دے بیٹھے۔
دوسری جانب قومی ٹیم کے کپتان بابر اعظم نے مزاحمت جاری رکھی۔ قومی کپتان 81 رنز بنا کر آؤٹ ہوئے جبکہ نائب کپتان محمد رضوان 37 رنز بنا سکے۔
دیگر کھلاڑیوں میں فواد عالم 1، آغا سلمان 4، محمد نواز 12، یاسر شاہ 27، حسن علی 11 اور نسیم شاہ 18 رنز بنا کر پویلین لوٹے۔ بابر اعظم 81 رنز کے ساتھ نمایاں رہے۔
سری لنکا کی جانب سے پراباتھ جے سوریا نے 5 جبکہ رمیش مینڈس نے 4 کھلاڑیوں کو آؤٹ کیا۔
سری لنکا نے پہلی اننگز میں 378 رنز اسکور کیے تھے جس کے جواب میں پاکستان اپنی پہلی اننگز میں 231 رنز بنا سکا تھا۔ جب کہ سری لنکا نے اپنی دوسری اننگز 360 رنز 8 کھلاڑی آؤٹ پر ڈکلیئر کرتے ہوئے پاکستان کو 508 رنز کا ہدف دیا تھا۔
دونوں ٹیموں کے درمیان دو میچز کی سیریز 1-1 سے برابر رہی۔ پاکستان ٹیم آج گال سے واپس پاکستان کے لئیے روانہ ہوجائے گی۔
